(1136) ഹോജയുടെ ലോകാവസാനം!

 ഹോജയെ പറ്റിക്കുന്ന ചില കൂട്ടുകാർ ആ നാട്ടിൽ ഉണ്ടായിരുന്നു. ഒരു ദിവസം അവർ പറഞ്ഞു -" ഹോജയെ  കാണുമ്പോൾ നാളെ ലോകാവസാനമെന്നു പറഞ്ഞ് അവൻ്റെ നല്ല ആടിനെ കൊന്നു തിന്നണം"

അവർ ഓടിക്കിതച്ച് ഹോജയുടെ ചുറ്റിനും കൂടി - "ഹോജാ, നീ അറിഞ്ഞോ? നാളെ ലോകാവസാനമെന്ന് ഒരു ദിവ്യൻ പ്രവചനം നടത്തിയിരിക്കുന്നു"

ഹോജയ്ക്ക് ആദ്യം കാര്യമെന്തെന്ന് പിടികിട്ടിയില്ല. അയാൾ ചോദിച്ചു - "അതിന് നമ്മൾ എന്തു ചെയ്യുമെന്നാണ് ?"

കൂട്ടുകാർ ഒരുമിച്ച് പറഞ്ഞു -"ഹോജാ, നാളെ എന്തായാലും ലോകാവസാനമാണ്. അതുകൊണ്ട് ഇന്ന് നമുക്ക് ആഘോഷിക്കണം. നിൻ്റെ ആടിനെ കൊന്ന് കറിയാക്കണം"

അവരുടെ ചതി അറിഞ്ഞ നിമിഷം തന്നെ അവർ ആടിനെ വളഞ്ഞ് കൊന്നു കഴിഞ്ഞിരുന്നു.

ഹോജ പാചകക്കാരനായി ജോലി ചെയ്തിട്ടുള്ളതിനാൽ അവരെല്ലാം ഹോജയെ കറി വയ്ക്കാൻ ഏൽപ്പിച്ചു.

ഇതിനിടയിൽ ഹോജ പറഞ്ഞു - "കൂട്ടുകാരെ, എൻ്റെ വീട്ടിൽ വിശിഷ്ടാതിഥികൾ പോലെ നിങ്ങൾ എന്തിനാണ് ഇരിക്കുന്നത്? നാളെ ലോകാവസാനമാണ്. ഇവിടെ ഔപചാരികത ഒന്നുമില്ല. അതിനാൽ, നിങ്ങളുടെ കുപ്പായമെല്ലാം ഈ മുറിയിൽ ഊരിവച്ച് വെളിയിൽ പോയി കാറ്റു കൊള്ളുക"

ഹോജാ തങ്ങളുടെ നുണ വിശ്വസിച്ചെന്നു പിറുപിറുത്തുകൊണ്ട് അവരെല്ലാം വിലയേറിയ കുപ്പായങ്ങളും മേൽക്കുപ്പായവുമെല്ലാം അവിടെ വച്ചിട്ട് മുറ്റത്ത് മരത്തണലിൽ വർത്തമാനം പറഞ്ഞിരുന്നു.

കുറച്ചു കഴിഞ്ഞപ്പോൾ വസ്ത്രങ്ങൾ കരിഞ്ഞ മണം വെളിയിൽ വന്നപ്പോൾ അവർ ഓടി മുറിയിലെത്തി. അവർ ഞെട്ടിപ്പോയി! വിലയേറിയ കുപ്പായങ്ങളെല്ലാം കറിപ്പാത്രത്തിൽ കരിയുന്നു!

അവർ ഹോജയോടു ദേഷ്യപ്പെട്ടപ്പോൾ അയാൾ പറഞ്ഞു -"നാളെ ലോകാവസാനമല്ലേ? ഇനി വില കൂടിയ വസ്ത്രങ്ങൾക്ക് നിങ്ങളുടെ ജീവിതത്തിൽ എന്തു സ്ഥാനമാണുള്ളത്?"

ഹോജയുടെ ആടിനെ കള്ളം പറഞ്ഞു കൊന്നത് വെറുതെയെന്നു പറയാൻ അവർക്കു കഴിഞ്ഞതുമില്ല!

Written by Binoy Thomas, Malayalam eBooks-1136- Hoja stories -72/ PDF-https://drive.google.com/file/d/1ZVlqI-Br4EkYNczF_uYp_T7X3nnyXi00/view?usp=drivesdk