(1146) സുഹൃത്തിൻ്റെ നടത്തം!
ഹോജയുടെ നർമ്മബോധം വെളിപ്പെടുത്തുന്ന ഒരു കഥ. നാട്ടിൽ ഒരു മരണം നടന്നപ്പോൾ സുഹൃത്ത് അദ്ദേഹത്തെ കാണാൻ വന്നു.
എന്തിനും ഏതിനും സംശയം ചോദിക്കുന്ന ഒരു പ്രത്യേകത ആ സുഹൃത്തിനുണ്ടായിരുന്നു. അയാളെ കണ്ട നിമിഷം ഹോജ പിറുപിറുത്തു -"ഇന്ന് ഇവൻ്റെ സംശയം എന്താണോ ആവോ?"
സുഹൃത്ത് വീട്ടിൽ കയറിയ ഉടൻ ഹോജയോടു ചോദിച്ചു- "എൻ്റെ അയൽവാസി മരിച്ചത് ഹോജാ അറിഞ്ഞല്ലോ. എനിക്കൊരു സംശയമുണ്ട് - ശവമഞ്ചവുമായി നടക്കുമ്പോൾ പെട്ടിയുടെ മുന്നിലാണോ പിന്നിലാണോ നടക്കേണ്ടത്?"
ഹോജാ പറഞ്ഞു - "മുന്നിലായാലും പിന്നിൽ ആയാലും കുഴപ്പമില്ല"
ഉടൻ സുഹൃത്ത് അടുത്ത ചോദ്യമെറിഞ്ഞു -"എങ്കിൽ, പെട്ടി പിടിക്കാൻ എത്രാമതായിട്ട് നിൽക്കണം?"
ഹോജ പറഞ്ഞു -"എത്രാമതായാലും കുഴപ്പമില്ല"
പിന്നെയും അയാൾ ചോദിച്ചു - "പെട്ടിയുടെ ഇടതു വശത്താണോ വലതു വശത്താണോ നടക്കേണ്ടത്?"
അന്നേരം, ഹോജയ്ക്ക് ദേഷ്യം വന്നു - "എടോ, ഏതു വശത്തായാലും കുഴപ്പമില്ല. പക്ഷേ, പെട്ടിയുടെ അകത്തായാൽ മാത്രമേ കുഴപ്പമുള്ളൂ!"
ആ മറുപടിയിൽ അയാൾ പേടിച്ചു പോയതിനാൽ കൂടുതലായി ഒന്നും ചോദിക്കാതെ സുഹൃത്ത് ഇറങ്ങി നടന്നു.
Written by Binoy Thomas, Malayalam eBooks-1146 - Hoja Stories - 82, PDF-https://drive.google.com/file/d/1l_W8ZrAnbznGEwjK9kmtbx0wK_YhyU6u/view?usp=drivesdk
Comments