മഹാന്മാരുടെ ജീവിത ദര്‍ശനങ്ങള്‍ വെളിപ്പെടുത്തുന്ന അവരുടെ വാക്കുകള്‍
എന്നെന്നും ഈ ലോകത്തെ പ്രചോദിപ്പിക്കുന്നു. ഒരേ
വിഷയത്തോടുതന്നെ വ്യത്യസ്തമായ സമീപനങ്ങള്‍ മഹാത്മാക്കളില്‍നിന്ന് ഉണ്ടായിട്ടുണ്ട്. വിവിധ
കാലദേശങ്ങളും സംസ്കാരവുമെല്ലാം അതിനെ സ്വാധീനിച്ചിരിക്കുന്നു. മഹാന്‍-മഹതികളെ
ഓര്‍ക്കുമ്പോള്‍ ആദ്യം മനസ്സിലേക്ക് ഓടിയെത്തുന്നത് അവരുടെ മഹദ്വചനം തന്നെയല്ലേ?
ഇത്തരത്തില്‍, ഓരോ വിഷയത്തിലുമുള്ള മഹത്തായ നിര്‍വചനം മനുഷ്യനെ നന്നായി ചിന്തിക്കാന്‍
പഠിപ്പിച്ചു. ചരിത്രം തങ്കലിപികളില്‍ അവ എഴുതിച്ചേര്‍ത്ത് അവരോടു കൂറുകാട്ടി. ഇപ്പോള്‍
നമുക്കു ലഭ്യമായ നല്ല പുസ്തകങ്ങളുടെ ഓരോ അദ്ധ്യായത്തിനും ചുവടെ മഹല്‍ വചനങ്ങള്‍ (great words, quotes)എഴുത്തുകാര്‍ ചേര്‍ക്കാറുണ്ട്- മേല്‍പറഞ്ഞവ
അടിവരയിട്ട് ഉറപ്പിക്കാന്‍ എന്നപോലെ. മനുഷ്യരാശിക്ക്
എന്നെന്നും പ്രകാശം ചൊരിയാന്‍ ഇതിനാകുമെന്ന് ഉറപ്പ്.
സാധാരണയായി ഹോസ്റ്റല്‍/ലോഡ്ജ്
അല്ലെങ്കില്‍ കുട്ടികള്‍ താമസിക്കുന്ന മുറികളുടെ ഭിത്തിയെ അലങ്കരിക്കുന്നത്
എന്താവുമെന്ന് നമുക്കറിയാം. എന്നാല്‍, മഹാന്‍-മഹതികളുടെ
ചിത്രങ്ങളും വചനങ്ങളുംപതിഞ്ഞ ചുവരിനുള്ളില്‍ താമസിച്ചവരെ ജീവിതവിജയം
അനുഗ്രഹിക്കുന്നതായി കണ്ടിട്ടുണ്ട്. എന്തായാലും, ഇങ്ങനെ
നല്ല കാഴ്ച നമ്മുടെ ദൃഷ്ടിയില്‍ പതിയുന്നത് ഗുണമേ ചെയ്യൂ. കുട്ടിക്കാലം
മുതല്‍ക്കേ, ബുക്കുകളില്‍ നല്ല കാര്യങ്ങള്‍ കുറിച്ചിടുന്നവര്‍ക്ക്
മഹദ്വചനങ്ങളുടെ ശേഖരവുമുണ്ടാകും. ലോകചരിത്രം ഒന്നുപരിശോധിക്കുകയാണെങ്കില്‍ ഇതൊക്കെ പിന്തുടര്‍ന്ന്
നാനാതരത്തിലുള്ള മതങ്ങളും ശൈലികളും ഉണ്ടായതായി കാണാം. ബുദ്ധമതം, ക്രിസ്തുമതം, ജൈനമതം, ശൈവര്‍, വൈഷ്ണവര്‍, സൂഫിസം, ഗാന്ധിസം, മാര്‍ക്സിസം, കണ്‍ഫ്യൂഷനിസം, ലെനിനിസം....ഇങ്ങനെ
ആ പട്ടിക നീണ്ടുപോകുന്നു.
Comments